Vestmanna bygdarráð samtykti við aðru viðgerð á fundi 23. novembur 2023 fíggjarætlanina fyri 2024.
Skattaprosentið er kvinkað eitt vet niður frá 21,25% til 21,15%, og barnafrádrátturin hækkar úr kr. 5.000 upp í kr. 5.500.
Foreldragjaldið fyri dagstovnatilboðið – har foreldrini bert rinda fyri eitt barn – er óbroytt, somuleiðis millummálaskipanin við egnari køkshjálp á Dagstovnaøkinum.
| INNTØKUR: | Mió. kr. |
| Persónsskattur | 53,8 |
| Flyting frá landinum vegna eldraøkið | 17,8 |
| Partafelagsskattur | 2,8 |
| Leiguinntøkur Heimið á Grønanes | 1,7 |
| Samlaðar inntøkur | 76,1 |
| ÚTREIÐSLUR: | Mió. kr. |
| Rakstur av kommununi | 5,8 |
| Heilsumál | 0,8 |
| Børn og ung | 22,2 |
| Eldraøkið | 20,9 |
| Mentan og fríðtíð | 3,5 |
| Tekniska økið | 9,1 |
| Havnin, umhvørvið og tilbúgving | 3,7 |
| Rentustuðul | 2,0 |
| Rentur | 0,3 |
| Samlaðar útreiðslur | 68,3 |
| Eftir til íløgur | 7,8 |
Raðfestingar í 2024
Góðar 9,4 mió kr. eru settar av til íløgur í 2024
Hallið á 1,6 mió.kr. stavar frá breiðkanini av Niðara vegi sum er flutt frá inniverandi ári til komandi fíggjarár.
Mentunar- og trivnaðarøkið
Vøggustovubørnini fáa nýtt spælipláss, umframt at onnur námsfrøði er raðfest.
Tilboðið á ungdómshúsinum Staðnum er víðkað, so tað eisini letur dyrnar upp fyri næmingum úr 6. flokki, og verður nýggja skipanin longu royndarkoyrd.
Tað eru alsamt fleiri børn, sum ynskja at spæla uppá ljóðføri, og tí hevur Musikkskúlin tørv á at gera ábøtur á verandi ljóðføri og íløgur í nýggj. Hetta fegnast bygdaráðið um og hevur játtað Musikkskúlanum pening bæði til ábøtur og útvegan av nýggjum ljóðføri.
Fyrireikingararbeiðið í samband við umvæling av skúlanum heldur á fram. Eisini er nýtt innbúgv til skúlan raðfest.
Eldrasamstarvið VEKS hevur lagt langtíðarætlan, har dentur er lagdur á, at vit kunna verða búgvandi heima, hóast vit gerast eldri, og at øll við sama tørvi fáa somu tænastu.
Tí skulu fyribyrgjandi átøk, so sum endur- og viðlíkahaldsvenjingar, sosialt virkni og samdøgurstænasta leggjast í eina fasta legu. Hetta sæst aftur í rakstrarútreiðslunum hjá kommununi men vil styrkja eldratænastuna, nú talið av eldri borgarum økist, sum árini ganga.
Vestmanna kommuna setti í summar ein mentanar- og ferðavinnumennara, sum umframt at samskipa tiltøk hjá kommununi, eisini skal menna og savna núverandi ferðavinnu og eggja nýggjum ferðavinnuáhugaðum at fara til verka. Hetta kemur at økja um trivnaðin í bygdini, og fer við tíðini eisini at geva kommununi fleiri skattakrónur.
Peningur er settur av til støðulýsing av Johnsa handli og til trý býlingsskeltir afturat.
Havnin og Brunamál
Nýggju bátabrúgvarnar er komnar, og tað hevur skund at leggja tær út. Fyrst er neyðugt at tøma sandin úr bátahylinum, sum er lagstur á botnin seinastu 30 árini. Kommunan hevur raðfest helvtina av kostnaðinum, hina helvtina – 1,25 mió kr. – rindar SEV.
Fleiri bátapláss verða tøk, tá nýggju bátabrúgvarnar eru lagdar út.
Peningur er settur av til skeið og dagføring av útbúnaði hjá Vestmanna Sløkki- og Bjargingarliði.
Tekniska økið
Ein maskina afturat til kavagrevstur er raðfest. Maskinan kann eisini brúkast til onnur endamál á tekniska økinum.
Dagføring av spillvatnsætlanini er raðfest, somuleiðis eru 1 mió kr. settar av, so arbeiðið at skipa kloakkirnar verður tikið uppaftur.
Byggjast skal uppí kommunuhøllina, so akførini hjá kommununi standa innandura og sostætt ikki slítast óneyðugt.
Gøtan Bakkavegur/Bøgøta og Gjógvaráætlanin eru raðfest umframt striking av vegum og gamla brúgvin um Fossá.
Umsitingin
Peningur er settur av til luftútskifti á kommunuskrivstovuni og til aðrar smáðar ábøtur.
Byggibúningur
Vestmanna kommuna eigur fimm tøk grundstykkir.
Fíggjarætlanin sæst her
Vegna Vestmanna Bygdarráð
Bjørg á Rógvi, borgarstjóri
