Vestmanna kommuna hevur gjørt av at vera við í ABC fyri sálarliga heilsu. Hetta fyri at geva vestmenningum enn betri karmar og íblástur at savnast til tiltøk, har fólk kunnu hugsavna seg og vera virkin saman. Tað, at fólk trívast og føla seg sum part av einum góðum felagsskapi, hevur alstóran týdning fyri einstaka menniskjað, ungt sum eldri.
Fólkaheilsustýrið fegnast um, at Vestmanna kommuna er nýggjasta kommuna í ABC samstarvinum.
“Síðan summarið 2017 hevur ABC fyri sálarliga heilsu arbeitt við einum hópi av kommunum, feløgum og stovnum, ið hava verið partur av einum sokallaðum ABC samstarvi. Í fyrstuni varð strembað eftir at útvega nýggjar samstarvsfelagar, men seinastu árini hava kommunur, feløg og stovnar sjálvi vent sær til Fólkaheilsustýrið fyri at gerast samstarvsfelagi. Fólkaheilsustýrið fegnast um hesa gongdina, tí tað vísir á eina motivatión fyri at skapa sálarliga heilsufremjandi karmar í nærumhvørvinum í Føroyum.”
Kommunan skipar fyri fleiri tiltøkum árliga, sum kunnu knýtast at ABC fyri sálarliga heilsu:
Eitt nú Válan, Vestmannadøgum við felags morgunmati, verkstovum á Staðnum og øðrum tiltøkum fyri fólk í øllum aldri. Umframt hetta letur Vestmanna kommuna eisini karmar til ymiskar felagsskapir, so sum Dagtilhaldið, Undirhúsið, Bátafelagið, VÍF, TableTop Føroyar v.fl. Sum ABC samstarvsfelagi ætlar Vestmanna kommuna m.a. at styrkja átøk sum hesi við at leggja dent á boðskapin um at vera virkin, saman og hugbundin.
Vestmanna kommuna fegnast um at verða partur av ABC samstarvinum og fer framyvir miðvíst at arbeiða við týdninginum av góðari sálarheilsu.
Ungdómsleiðarin og mentanar- og ferðavinnumennarin verða ABC samskiparar í kommununi.
Boðskapurin í ABC
ABC fyri sálarliga heilsu er ein granskingargrundað sálarliga heilsufremjandi ætlan, ið umframt at skapa sálarliga heilsufremjandi umhvørvi kring landið, eisini roynir at fáa einstaklingin at røkja og fremja sálarligu heilsuna hjá sær sjálvum og øðrum. ABC fyri sálarliga heilsu hevur tríggjar einfaldar, ítøkiligar og jaligar boðskapir, sum eru fyri øll – børn, ung, vaksin og eldri – og sum kunnu styrkja sálarligu heilsuna:
VER VIRKIN: Ver virkin likamliga, sálarliga, sosialt og andaliga: gakk ein túr, lúka í urtagarðinum, tosa við ein granna, telva, les eina bók ella ver djúphugsin og njót náttúruna.
VER SAMAN: Ver partur av einum bindiklubba, tónleikabólki, bókaklubba, ítróttaliði ella ver enn meira virkin í einum bólki, tú longu ert partur av. Ver saman snýr seg um kensluna av at hoyra til.
VER HUGBUNDIN: At vera hugbundin, sipar til at vera uppií onkrum ella binda seg til okkurt við fullum huga, sum gevur meining fyri teg. Ger sjálvboðið arbeiði, set tær sjálvum eina avbjóðing, lær okkurt nýtt ella hjálp onkrum við onkrum.
