Vestmanna kommuna skal hava nýggjan kommunuskrivara, ið saman við bygdarráði og umsiting skal standa fyri støðugu menningini av kommununi.
Kommunuskrivarin er starvsfólkaleiðari fyri 80 starvsfólk, ið starvast innan ymisk øki hjá kommununi.
Kommunuskrivarin er fremsti ráðgevi hjá borgarstjóranum og bygdarráðnum. Arbeiðið fevnir um alskyns uppgávur innan avgreiðslu og ráðgeving í eini politiskt stýrdari umsiting, umframt fyrifallandi skrivstovuuppgávur.
Kommunuskrivarin móttekur og samskipar innkomin mál til nevndarviðgerð, avgreiðir mál frá bygdarráðsfundum í samráði við borgarstjóran, umsitur heimasíðuna og journalskipanina.
Vit vænta av tær
At tú hevur viðkomandi útbúgving og royndir innan leiðslu og umsiting. Áhugi og førleiki innan málsviðgerð er sjálvandi alneyðugt.
Neyðugt er, at tú hevur góð samstarvsevni og hegni at umboða kommununa mótvegis borgarum, almennum stovnum og øðrum samstarvsfeløgum, eisini tá tørvur er at vera tolin.
Tú dugir væl at samskifta og kann orða teg greitt í skrift og talu á føroyskum, donskum og enskum.
Tú hevur førleika at arbeiða undir skiftandi umstøðum, tí arbeiðstrýstið kann vera skiftandi og partar av arbeiðinum kunnu liggja uttan fyri vanliga arbeiðstíð.
Vit bjóða
Starvið er fjølbroytt og við góðum møguleika fyri bæði persónligari og fakligari menning. Tú fert at arbeiða í einum spennandi umhvørvi við skiftandi uppgávum innan kommunala umsiting.
Setanarviðurskifti
Løn verður ásett sambært sáttmála millum Kommunala arbeiðsgevarafelagið og Starvsfelagið lønarflokk 8 stig 6. Arbeiðstíðin er 39 tímar um vikuna. Í arbeiðstíðini er íroknað fundarluttøka, sum liggur uttanfyri vanliga arbeiðstíð.
Umsóknir við prógvum, c.v. og øðrum viðkomandi skjølum, skulu sendast til: pauli@vestmanna.fo og vera okkum í hendi í seinasta lagi 21. juli 2021. Starvið ynskist sett skjótast gjørligt og samrøður vera hildnar leypandi.
Vilt tú vita meira um starvið, kanst tú venda tær til Paula T. Petersen, borgarstjóra, á tlf. 770 107 ella pauli@vestmanna.fo.
Um kommununa
Vestmanna kommuna er ein virkin kommuna, ið við 1.260 íbúgvum er næststørsta kommunan á Streymoynni. Kommunan hevur ríkt mentanar- og ítróttalív, har øll frá barnafamiljum til eldri kunnu trívast. Í bygdini er miðnámsskúli, SEV verk, eitt virkið vinnulív, umframt handlar, matstova og mangt annað. Á skrivstovuni hjá kommununi starvast 4 fólk og borgarstjórin, umframt umsitingin hjá VEKS.
