Í dag skrivaðu forfólkini í Roðanum, Nánd, Norðoya Bú- og Heimatænastu og VEKS undir avtalu um dagtilhald og umlætting til yngri við demens.
4. november í fjør legði landsstýrið fram á ting uppskot til løgtingslóg um broyting í løgtingslóg um heimatænastu, eldrarøkt v.m. (Ábyrgdin av dagtilboðum og umlætting til fólk við demenssjúku undir fólkapensjónsaldur verður flutt til kommunurnar.) Longu 2. desember tók Føroya løgting samfelt undir við uppskotinum. Frammanundan hesum høvdu tingingar verið og semja gjørd um málið millum Kommunufelagið og Almannaráðið.
Síðan tá hava eldrøkini Roðin, Nánd, NBH og VEKS tosað saman og samráðst um ein felags leist hesum viðvíkjandi. Í dag kl. 14 skrivaðu forfólkini undir eina samstarvsavtalu.
Í stóran mun er avtalan skipað soleiðis, at Roðin hevur dagligu umsitingina av tilboðnum, og leiðsla og starvsfólk eru somuleiðis starvssett í Roðanum.
Kostnaðurin verður býttur eftir fólkatalinum í økjunum. Ein politiskur stýrisbólkur, við forfólkunum í teimum fýra eldrasamstørvunum, verður settur til at taka sær av teimum málum, ið snúgva seg um tal av plássum, normering, samstarvstreytum, húsaleigu, staðseting o.s.fr. Í einum samstarvsbólki sita teir fýra leiðararnir í eldrasamtørvunum. Bólkurin tryggjar verkligu samskipanina millum samstørvini og virkar eisini sum visitatiónsnevnd. Eitt fakligt umboð, sum kortini ikki er umboðað í hesum bólkinum, skal ráðgeva bólkinum í visitatiónsmálum.
Avtalan er galdandi frá 1. januar 2026. Í fyrstu atløgu er hon galdandi í tvey ár fram, men kann halda fram, um ikki onnur avgerð verður tikin. Gongdin og samstarvið verður eftirmett fyri 1. oktober 2027.
Í fyrstu atløgu heldur dagtilhaldið á Glyvrum fram, og at kalla sama manning – sum frammanundan – er sett til at taka sær av tilboðnum frameftir.
Karl Haldursson Johansen, NBH.
Per Martin Gregersen, Nánd.
Sára Jógvansdóttir, VEKS.
Tórbjørn Jacobsen, Roðin.
